जांबरूग फाट्यावरून कर्जत जाणाऱ्या तसेच हाळ खुर्द ग्रामपंचायत कार्यालयाशेजारील मार्गावर गतिरोधक टाकावा, अशी मागणी शिवशाही व्यापारी संघाच्या वतीने करण्यात आली आहे. महाराष्ट्र राज्य प्रदेश उपाध्यक्ष अल्ताफ मंसुरी व खोपोली शहर उपाध्यक्ष तौफीक करंजीकर यांच्या नेतृत्वाखाली आज शिवशाही व्यापारी संघाच्या पदाधिकाऱ्यांनी हाळ खुर्द गावाला भेट देवून नागरिकांच्या समस्या व अडचणी जाणून घेतल्या. यावेळी ग्रामपंचायत कार्यालयासमोरील मार्गावर गतिरोधक टाकण्याची मागणी करण्यात आली.
खोपोलीवरून कर्जतकडे जाणारा मार्ग मोठ्या रहदारीचा आहे. पाली, पेण, पुण्याकडून येणारी वाहने याच मार्गाने कर्जतला जात-येत असतात. अवजड वाहनेही भरधाव वेगाने आवागमन करीत असतात. रस्त्यांच्या दुसऱ्या बाजूला ग्राम पंचायत कार्यालय, शाळा, दुकाने असल्याने हाळ खुर्द येथील नागरिकांना रस्ता ओलांडून येणे-जाणे करावे लागत असते. पण भरधाव वेगाने आवागमन करणाऱ्या वाहनांमुळे लहान मुले व नागरिकांना जीवमुठीत घेवून रस्ता ओलाडांवा लागतो. तरी ग्रामपंचायत कार्यालयासमोरील मार्गावर गतिरोधक टाकावा तसेच रस्त्यांच्या दोन्ही बाजूला फलक लावून वाहन चालकांना पुढे गाव असल्याचे सुचित करावे, असे आवाहन शिवशाही व्यापारी संघ खोपोली शहर उपाध्यक्ष तौफीक करंजीकर यांनी केले.
Comments
Post a Comment