रेल्वे कर्मचाऱ्यांनी वाचवले वासराचे प्राण खोल दरीत उतरून अडकलेल्या वासराला दीले जिवदान

खोपोली (किशोर साळुंके ):- मुंबई-पुणे रेल्वे मार्गावर खंडाळा घाटातल्या मंकी हिल जवळ दरड कोसळल्याने काही काळ रेल्वे वाहतूक व्यवस्था विस्कळीत झाली होती. तात्काळ त्या ठिकाणी कर्मचारीवर्ग पोचला आणि महामार्गावरचा अडथळा दूर केला होता. त्यासोबत कर्मचाऱ्यांनी काल दिनांक 4 सप्टेंबर रोजी सुरक्षेच्या दृष्टीने रेल्वे मार्गावर सर्वेक्षण सुरू केले असताना रेल्वे रुळावरून गाईचे वासरू वाट चुकून रुळावरून चालताना त्यांना दिसले. अपघात होऊ नये म्हणून कर्मचाऱ्यानी त्या वासराला बाजूला करण्याचे प्रयत्न केले, तोवर समोरून ट्रेन आली. ट्रेनचालकाने सावधानता दाखवत वेग कमी करून हॉर्न वाजवून वासराला सावध केले. अचानक घडलेल्या घडामोडीत भांबावलेले वासरू सैरभैर होवून दरीत कोसळले. ट्रेन पुढे जाताच गणेश पर्चंड, प्रचंड अमोल साठे, हरिष मौर्य आणि इतरजण वासराचा मागोवा घेण्यासाठी दरीत उतरले. दरित कोसळलेले वासरू सुदैवाने लगतच्या पाईपलाईन मध्ये अडकलेले आढळले. सर्वांनी शिकस्त करून वासराला सुखरूप बाहेर काढले. रेल्वे कर्मचाऱ्यांच्या या सतर्कतेमुळे वासराचे प्राण वाचले. भूतदया दाखवल्या बद्दल रेल्वेच्या अधिकारी वर्गाकडून या कर्मचाऱ्यांचे कौतुक होत आहे.