खोपोलीत शांतता कमिटीची बैठक संपन्न.

खोपोली (किशोर साळुंके ) देशभरातील दुर्दैवी घटनांचे पडसाद खोपोलीत न उमटल्याने पोलीस प्रशासनाने मानले सर्वांचे आभार खोपोली : देशभरात विविध ठिकाणी त्रिपुरा मधील विवादास्पद घटनेच्या पार्श्वभूमीवर उमटलेल्या पडसादाची कोणतीच लक्षणे खोपोली शहरामध्ये दृष्टीपथास आलेली नसल्याचे संपूर्ण श्रेय हे खोपोलीतील सुज्ञ जनतेलाच जाते, त्यामुळे पोलिस प्रशासनाच्यावतीने मी सर्व खोपोलीकरांचे कौतुक करतो, अशा शब्दात शांतता कमिटीच्या बोलावलेल्या तातडीच्या बैठकीत खोपोलीचे पोलीस निरीक्षक शिरीष पवार यांनी प्रतिपादन केले. विवादित घटनाक्रमाचा विपर्यास्त सोशियल मीडियाच्या माध्यमातून झाल्याने सामाजिक सलोखा बिघडला आणि परिणामांती दंगली सारख्या घटना घडल्या त्याबाबतीत खोपोलीकरानी अत्यंत सोशिक भूमिका घेतलेली आहेच मात्र भविष्यात कोणत्याही घटनेची पार्श्वभूमी समजून घ्यावी आणि कोणत्याही अफवेवर विश्वास ठेवू नये अशी सूचना वजा आवाहन पोलीसनिरीक्षक पवार यांनी या बैठकीमध्ये केले. खोपोलीच्या नगराध्यक्षा सुमन औसरमल यांनीही शांतता कमिटीला संबोधित करून कोणताही अनुचित प्रकार घडणार नाही याची खात्री देताना त्यासाठी यापुढे आपण सर्वजण सतर्क राहणार आहोत अशी हमी देत पोलीस प्रशासनाला सर्वतोपरी सहकार्य करण्याची भूमिका विषद केली. खोपोलीतील राजकीय, सामाजिक क्षेत्रातले नेते आणि कार्यकर्ते, व्यापारी असोसिएशनचे पदाधिकारी, विविध संघटनांचे कार्यकर्ते आणि पत्रकार यावेळी उपस्थित होते.