अपघातग्रस्तांच्या मदतीसाठी सामाजिक संस्थेकडून "गुरुकुल इंटरनॅशनल स्कूलमध्ये" विद्यार्थ्यांनी गिरवले आपत्ती व्यवस्थापनाचे धडे

खालापुर तालुक्यातील गुरुकुल इंटरनॅशनल स्कूलमध्ये सामाजिक सप्ताह २०२२ चे आयोजन केले गेले आहे. या सप्ताहात एक पुष्प अपघातग्रस्तांच्या मदतीसाठी सामाजिक संस्थेच्या सदस्यांच्या मार्गदर्शनपर कार्यक्रमाच्या माध्यमातून अर्पण केले गेले. देशाची सेवा करण्यासाठी सैन्यदल, पोलीस दल किंवा प्रशासकीय यंत्रणा हेच माध्यम आहे, हा गैरसमज सर्वानी मनातून काढून प्रत्येकजण आपल्या हाती असलेल्या संसाधनातून आणि दैनंदिन जीवन जगत असताना देशाची सेवा सहजपणे करू शकतो याचे विश्लेषण संस्थेचे अध्यक्ष गुरुनाथ साठेलकर यांनी केले. कोणत्याही आपत्कालीन प्रसंगी सतर्कता दर्शवल्यास त्याची तीव्रता कमी होत असते हे छोट्या छोट्या उदाहरणाद्वारे स्पष्ट केले. जगदिश मरागजे यांनी सहज सोप्या शैलीत शालेय विद्यार्थी देखील आपत्कालिन प्रसंगी सावधानता दर्शवून कशी मदत करू शकतो या संदर्भात मार्गदर्शन केले. विद्यार्थी दशेपासूनच आपण सामाजिक कार्याला प्राधान्य देण्यास शिकले पाहिजे हीच संस्कृती आणि हेच खरे संस्कार असल्याचे सांगीतले. गुरुकुल इंटरनॅशनल स्कूलच्या प. पू. विश्वमंगल दास स्वामी आणि ब्रह्मस्वरूप दास स्वामी यांनी अपघातग्रस्तांच्या मदतीसाठी निरंतर कार्यरत असणाऱ्या गुरुनाथ साठेलकर, विजय भोसले, जगदीश मरागजे आणि अमोल कदम यांचे स्वागत करून संस्थेच्या कार्याचे कौतुक केले. या कार्यक्रमाचे सूत्र संचालन प्रा. योगेश पवार यांनी केले. अपघातग्रस्तांना मदत करतानाच्या छायाचित्रांचा स्लाईड शो पाहून संस्थेचा विद्यार्थी आणि कर्मचारी वर्ग प्रभावित झाला.